Zer eskaintzen dugu?

FORMAZIOA

Herri feminista bat eraikitzeko eraldaketa pertsonalak eta kolektiboak bultazeko ikastaroak eskaintzen ditugu. Emakume talde, talde feminista, herri mugimendu eta erakunde publiko zein elkarte pribatuetan ikastaroak, tailerrak, lan saioak eta aholkularitzak ematen ditugu. Hauek dira eskaintzen ditugun gaiak. Behar eta eskaera zehatzetara ere moldatzen gara:

Feminismoaren oinarriak eta Genealogia Feministak

Munduan zein Euskal Herrian Mugimendu Feministak izandako bilakaera eta aldarrikapenak ezagutzea etorkizuneko erronkei aurre egiteko tresna ezin hobea da. Historia ezagutzeak, aurrera begiratzen laguntzen baitigu!

HEZKIDETZA ETA PEDAGOGIA FEMINISTAK

Eskola eta hezkuntza komunitatean genero estereotiporik gabeko hezkuntza prozesuak nahi ditugu, nork bere bizitza-proiektua askatasunean aukeratu ahal izateko. Arraza, klasea, generoa, etnia, kulturak etab. sortzen dituen desberdinkerietatik at eta aniztasun horren errespetuan oinarrituz.

AUTODEFENTSA FEMINISTA

Zer dira eraso sexistak? Nola pairatzen ditugu? Zeintzuk dira gure bizipenak honen aurrean? Nola identifikatu erasoak? Emakumeok pasibotasunaren ideian hezten gara eta babes beharra dugun pertsonak garela sinesten dugu. Ideia hori hautsi eta gure buruak aitortu, egoeraz jabetu eta boteretzeko autodefentsa feminista lehenesten dugu. Egin aurre indarkeria sexistari. Nik, zuk, guk…ekin!

Jaiak Ikuspegi Feministatik

Festak jendarte eta kultur adierazpenak dira, sentsazio eta emozioz beteriko erritoak. Gure jendartearen ordena erreproduzitzen dute, horregatik gure herrietako jaietan murgildu eta elementu diskriminatzaileak identifikatu eta horiei aurre egiteko bitartekoak eskainiko ditugu.

Indarkeria matxistak: protokoloak

Indarkeria Matxistarekin amaitzeko azken urteetan martxan izan dugun protokoloa izan da Mugimendu feministatik datorren tresna bat. Indarkeria Matxistaren aurrean herriko, jai batzorde edo eragilearen protokoloa ezagutu, erasoen aurrean nola jokatu eta tresna honetan sakontzeko saioa izango dugu.

Zaintza eta ekonomia feminista

Krisi testuinguru honetan, genero ardura naturalizatuak egonkortzen ari dira. Ekonomia feminista lan saio honen bitartez, generoak duen dimentsio sozioekonomikoan sakonduko dugu. Emakumeak eta gizonak ekonomian kokatzeaz haratago, feminitatea eta maskulinitatea ekonomian nola eraikitzen den ikusiko dugu. Bizitza prekarioetatik bizitza gozagarrietara salto egiteko lehen pausuak emateko saioa dugu hau.

genero botere harremanak elkarteetan

Erakunde, elkarte edo kolektibo mistoetan generoagatik dauden botere harremanak, parte hartzearen desorekak edota jarrera eta eraso matxistak ikusarazi, kolektibizatu eta hauek orekatzeko edo deuseztatzeko baliabideak eskainiko ditugu. Horretarako, lehenengo bi saioak espazio banatuetan egitea eta azkeneko saioa elkarrekin egitea proposatzen dugu.

Irakurle Taldea Antiarrazismotik

“Ez da nahikoa arrazista ez izatea, antiarrazista izan behar da”. A. Davis. Literaturaren bidez arrazakeriaren aurkako ahalduntzea eta pentsamendua kritikoa eraikiko dugu Arrazakeriaren aurpegiak ikusteko.

Ikastaro bakoitzari buruzko informazio gehiago jaso nahi baduzu,
idatzi emagin@emagin.eus helbidera
edo deitu (+34) 943 59 09 02 zenbakira