ELKAR ZAINDUZ ARRISKUTSUAK GARA! COVID-19AREN INPAKTUA EMAKUMEENGAN: INDARKERIA MATXISTA ETA ZAINTZA LANAK

22 - 02 - 10

ELKAR ZAINDUZ ARRISKUTSUAK GARA! COVID-19AREN INPAKTUA EMAKUMEENGAN: INDARKERIA MATXISTA ETA ZAINTZA LANAK

ERAKUSKETA + DOSIERRA

Ordura arte ezagutzen ez genuen ez ohiko egoera ezarri zen 2020ko martxoaren 14ean. Covid-19aren osasun krisiak ordura arteko normaltasuna eztandarazi zuen gure etxeko atarian, eta aukera izan genuen indarkeriaz zein zapalkuntzez osatuta dagoen normaltasuna habitatzen duten munstroak agerian uzteko. Horrenbestez, Mugimendu Feministatik urteetan salatzen ari ginen zibilizazioaren krisia edota sistema osoaren krisi sakona agertzeko aukera izan genuen; argi izpi bat.

Krisia bera kronikoa zen, Covid19a, ordea, iragankorra nahi dute. Baina, gure esku dago krisia guztiz kronifikatzen ez uztea, erroak aldatzea, eta bortizkerian oinarrituko ez den jendarte berria eraikitzea; trantsizio ekofeminista hauspotzea, hain zuzen ere. Horregatik, egin dugu lan hau, gertatzen zaiguna ulertzeko ekarpen txiki gisa. Denbora behar izan dugu, abiadura handiz ezin izan baikenuen aztertu Gipuzkoako emakumeen errealitatean zer zetorren lehendik eta zer berri ekarri zituen pandemiak.

Bi ardatz aletu ditugu: indarkeria matxista eta zaintza-erregimena. Eta horietan aztertu, esan bezala, zein elementu berri ditugun eskuhartze feministarako. Txosten bat atera dugu, eta erakusketa bat, Euskal Herriko herrietan jartzeko.

BIZITZAK ERDIGUNEAN: OÑATIKO ZAINTZAILEEN GENEALOGIA FEMINISTA BAT

22 - 02 - 10

BIZITZAK ERDIGUNEAN: OÑATIKO ZAINTZAILEEN GENEALOGIA FEMINISTA BAT
1950-2020

Aitortza ariketa bat egin genuen, Oñatiko emakumeen, lehengoen eta oraingoen lan eskergarena. Eta berrikuspen bat ere egin nahi izan genuen: zaintzaren erromantizazio eta mitifikazioaren diskurtso patriarkalaz gain, kontakizun zintzoa eta osoa egin: bizitzaren zalantzak, ertzak, etxeko trapu zikinak, nahi eta ezinak, gatazkak zein kolektibotasuna edota elkarrekikotasuna nola hezurmamitu dituzten azalduko. Finean, zaintza lanetan murgilduta bizi izan diren langileen egoerarekin fidela izan nahiz zuen lanak: maitasunaren pozaz harago, zaintzara dedikatzearen hazkurak, kontraesanak eta minak ere azalaraziko zituena.

1950etik 2020 arteko askotariko emakume zaintzaileen genealogia ondu genuen, euren hainbat bizi esperientzia eta munduan egoteko moduen ertzak jasota: generoa, klasea eta arraza ardatz. Bi ildo Ditu etnografiak, bata, neskametatik etxeko langiletarako genelogia; besteak, XX.mendeko etxekoandreak eta, gaur egun, hazkuntza naturalaren alde egiten duten amak lotzen ditu.

Jarrain duzuen bideoan azalpen sakonagoa duzue:

Liburua ere eskuratu daiteke hainbat tokitan. Jarri gurekin harremanetan bestela!

EAEko eskolen diagnosia

22 - 02 - 08

EAEKO ESKOLEN BERDINTASUN EGOERAREN DIAGNOSTIKOA

Emakundek etorkizun hurbil batean gida bat sortu nahi du, eta horren bidez eskolei diagnostikoa eta berdintasun/hezkidetza plana egiteko eta kontuan izan beharreko beste atal batzuk lantzeko gidalerroak eskaini nahi zaizkie. Gida hori ikastetxeentzat ahalik eta baliagarriena izan dadin, beharrezkoa da ezagutzea egun zer-nolako errealitatea dagoen, zein den egiten den lana, zer ez den egiten eta zeintzuk diren aldeko eta kontrako faktoreak.

Beraz, ikerketa honen helburua EAEko eskoletan, berdintasunaren lanketari dagokionez, gaur egun duten egoera erreala ezagutzea da; hau da, berdintasunaren txertaketa maila zein den jakitea, baita berdintasuna landu duten eskolek nola egin duten, zer baliabide erabili dituzten, norekin egin duten eta zer zailtasun izan dituzten ere.

Ikerketa hau aurrera eramateko elkarlanean ari gara honako eragileak: Aztiker Soziologia Ikergunea (inkestaren diseinu teknikoa egiteko arduraduna, eta atal kuantitatiboan landa lana aurrera eraman eta datuen jasoketa eta oinarrizko ustiaketarako arduraduna), Emagin Elkartea (atal kualitatiboan landa lana aurrera eraman eta datuen jasoketa eta oinarrizko ustiaketarako arduraduna) eta Mireia Delgado Exposito.

LAGA MANKOMUNITATEKO KOORDINAZIORAKO PROTOKOLO INTERINSTITUZIONALA

21 - 05 - 13

LAGA MANKOMUNITATEKO KOORDINAZIORAKO PROTOKOLO INTERINSTITUZIONALA

Leitza, Goizueta, Areso eta Aranoko berdintasun zerbitzuak hala eskatuta, udalerri hauetan eragingo lukeen genero Indarkeria Kasuetan erakunde-arteko koordinazioa ahalbidetzeko protokoloa osatzeko aurre diagnostikoa eta protokoloa egin ditugu ikasturte honetan. Emakumeen kontrako indarkeria dela eta, esku hartze integral baten ikuspegitik, erakundeen jardun eta erantzuna bateratzea dute helburu nagusi protokoloek, Nafarroako Emakumeen Aurkako Indarkeriaren Koordinatzeko Erakunde arteko III. Akordioak ezarritako esku-hartze esparru berrian jasotzen den eran. Protokolo bat, arau eta estandarren multzo bat da, protokoloa sinatzen duten eragileek nola jokatu behar duten adierazten duena. Eta emakumeen aurkako indarkeria kasuetan esku hartze integralak, homogeneoa eta neurrikoa izan dadin, protokoloak egituratzea ezinbestekoa da, Emakumeen Aurkako Indarkeria, jarduteko eta koordinatzeko Tokiko Protokoloak Prestatzeko Gida-k (Ibarrola, 2018) jasotzen duen eran. Halaber, protokoloak tresna erabilgarri dira jardunbideak normalizatu, eragin handiagoa izan dezaten lagundu eta emakumeen aurkako indarkeriaren forma eta adierazpen guztien eraginari buruzko informazioa jasotzeko.

INDARKERIA MATXISTAREN PREBENTZIO EZ MIXTOA IKASTETXEETAN

21 - 05 - 06

INDARKERIA MATXISTAREN PREBENTZIO EZ MIXTOA IKASTETXEETAN

Aurten ere Leioan indarkeria matxistaren prebentzio ez mixtoa landu dugu -Barandiaran, Betiko, Mesedeetan zein Adsis- ikastetxeetan. Neskekin autodefentsa feminista landu dugu, eta mutilekin, berriz, maskulinitate berriak. Hala nola, genero desberdintasunaren inguruan hausnartu dugu, baita patriarkatuak gure jendartean dituen ondorioetan ere. Oro har, nesken ahalduntze pertsonal zein kolektiboan eta mutilen botere desjabekuntzarako bidean urrats garrantzitsuak ematen hasi gara.