Emagin Elkartetik emakumeon osasuna sustatzeko bide kolektiboak arakatu nahi ditugu. Horregatik, gure gorputzen kontzientzia bultzatu, eta burua zein gorputzaren artean sortu dugun amildegia gainditzeko ahaleginean ari gara. Horri begirako taldekako lan saioak abiatu ditugu Nagore Orbeltzu Lakosterekin.
Emaginetik jaietan Indarkeria Sexistaren aurreko prebentzio lanetarako GUNEA jartzen hasi gara aurten ere. Hemen duzue egiten dugun lanaren bideo bat ikusgai.
Zuetako askok aski ongi ezagutzen duzue GUNEA, besteak beste, urte hauetan herri askotan egon garelako lanean. Ibilbideak eta esperientziak eraman gaitu jaietan ematen den indarkerian sakontzera eta urtez urte zerbitzu hau hobetzera. Eskerrik asko beraz bide honen parte izateagatik!
Oharra: zuen herriko jaietan Gunea jartzeko asmoa baduzue, ahalik eta azkarren abisatzen joatea eskertuko genizueke emagin@emagin.eus helbidera mezua bidalita. Eskerrik asko!
Hemen duzue bide berriak arakatu nahi izan dutenen kontakizuna, patriarkatuari XXI. mendean aurre egiteko; emakume batzuen erresistentziaren historia laburra; zapalkuntzaren gau luzean jaio eta itzali ez den birramonen suarekin bizimodu duinen alde borrokatu dutenen kontaketa; aldaketa posible dela sinisten dutenena; arau sozialetatik desbideratu nahi dutenena; iraultza ezinbestean feminismotik eraiki behar dela sinesten dutenena. Euskal Herriko Bilgune Feministaren ibilbide oparoa jaso dugu liburuxka honetan. Euskal Herriko Bilgune Feministak eta Emagin Formazioa eta Ikerketa Feministak elkarlanean egin dugu lan hau. Durangon izango duzue salgai!
Urriaren 27an Bildu ginen Azpeitian. Han izan ginen lehenengo aldiz bilduta Emaginekin modu batean edo bestean harremana dugun kideak. Ez zen ohiko asanblada izan, bazuen berezitik zerbait. Urte luze hauetan Emagin sortu eta egin duten kideen ekarpenetatik tiraka Emagin eguneratuago bat aurkeztea zen asmoa. Gogotsu eta ilusioz beterik heldu genion erronkari.
Hasteko, Idoia Trenor Emagineko lehendakariak hitza hartu zuen eta asanbladaren nondik norakoak azaldu zituen. Ondoren, Edurne Epelde kideari eginiko elkarrizketaren bideoa ikusi genuen. Bertan azaldu zituen Emaginen sorrera prozesua eta azken urteetan egon diren aldaketak.
2017-2018 urteari begirako plangintzaren helburuak eta ekimen zehatzak aurkeztu ziren ondoren Idoia Arraiza kidearen ahotan. Ondoren, Emaginen logotipo berritua aurkeztu zen eta baita webgune berriaren hezurdura eta edukiak erakutsi zituen Arantza Santestebanek.
Elkartearen barne bizitza antolatzeko eta ordenatzeko asmoz, barne funtzionamendurako akordioa aurkeztu zuen Miren Arangurenek. Emaginek badu iparrorratza datozen hilabeteetan bere jarduera kideen arteko akordio zabalean oinarritu garatzeko. Honetaz gain Ainara Lasak, urteko kontuen balantzea aurkeztu zuen.
Eztabaidarako ez zen tarte luzeegia geratu, halere, meriendaren bueltan egon zen iritzi trukeak eta sentsazioak partekatzeko aukera. Kurtsoaren amaieran, asanblada berri bat ospatzeko gogoekin geratu ginen, hortaz, han ikusiko dugu elkar hurrengoan!
Azaroaren 11n eta 12an bildu ginen Eibarren Udako Euskal Unibertsitateak duen egoitzan “Prozedura feministak: ezagutza, ikerketa eta herrigintza” deituriko ikastaroan.
30 lagunetik gora izan ginen bertan. Tartean, profil askotariko pertsonak: ikerlariak, interesa zutenak, herri mugimendutako kideak eta unibertsitateko irakasleak. Arlo ezberdinetan sakondu zen. Memoria eta genealogia feministen garrantziaz aritu ziren Miren Aranguren, Edurne Epelde eta Amagoia Gurrutxaga ostiral arratsaldean. Larunbatean hasiera eman genion ikastaroari ikerketa prozesuen inguruan hausnartzen. Lehenengo mahai inguruan Marta Barbak, Oihane Uitzik, Haizea Barcenillak eta Iratxe Retolazak egun akademiaren baitan ezagutzaren eraikuntzan sortzen diren prozesu ezberdinak izan zituzten hizpide. Epistemologia eta metodologia feministak oinarri hartuta, ezagutzaren eraikuntzarako bestelako prozesuetaz aritu ziren eta baita akademian ematen diren botere harremanetaz ere.
Ondorengo mahai inguruan, Itziar Gandarias, Nerea Fillat, Miren Guillo eta Pili Alvarezek esku artean dituzten ikerketa proiektu ezberdinak azaldu zituzten. Bukatzeko, elkarren arteko eztabaidaren bidez, aurrera begira eremu honetan parte hartzen dugun ikerlari eta esperientzia ezberdinak saretzeko beharraz eta prozeduraz aritu ginen.
Hemen ikastaroak utzi zituen irudi batzuk.
