22 - 09 - 23
2022ko udaldia ezohiko udaldia izan da; pandemiaren ondoren lehenengo jaiak ospatu dira. Aurreikuspenak eta espektatibak gainditu dituen uda bat izan dela esan daiteke, Emaginen lanak erreferentzia lortu du eta herri txiki, auzo eta hiriburuetako jai ugari eta oso anitzetan egon gara Indarkeria Matxistarik gabeko guneen zerbitzua eskaintzen, baita erasoak salatzeko eta eskuhartzeko telefono arreta zerbitzuarena ere: Hernani, Arrasate, Aiara, Iruñako San Ferminetan, Villabona, Donostiko Aste Nagusian, Ibarra, Andoain, Sakana, Antsoain, Gernika, Galdakao, Ondarru, Oiartzun, Getaria, Leitza, Bakio, Laudio, Mutriku, Zornotza, Arrasate, Orio, Mañeru, Muskiz, Amurrio, Orereta… Izan daira horietako batzuk.
Zerbitzu hauen helburuak emakumeak eta herritarrak, oro har, indarkeria sexistaz kontzientziatzea, bizipen, iritzi eta interesak jasotzea eta babes eta elkartasun gunea irudikatzea eta indarkeriari aurre egiteko bitartekoak erraztuko dituen erreferentzia espazio batzuk sortzea izan dira. Baita erasotzaile izan daitezkeenei dena libre ez dela eta erasoak dauden kasuetan erantzuna izango dutela ohartaraztea ere.
Bi funtzio nagusi bete ditugu: alde batetik, prebentzio lan handia egin da (beldurraren diskurtsoen aurrean autodefentsa feministarako eta emakumeek beren burua defendatzeko duten gaitasunaz jabetzeko eta jaietaz gozatzeko bitarteko eta lan tresnak eskaintzen saiatu gara). Beste aldetik, baita erasoen aurrean esku-hartzeak egin eta baliabideak eskaintzea izan da gure funtzio nagusia.
Ikasturtean zehar ere horrelako zerbitzuak eskaintzen ditugu, indarkeria matxistari aurre egiteko tresna, baliabide eta jarrerak lantzea garrantzitsua baita: prebentzio lana zein esku-hartzeetarako baliabideak sozializatu eta inbertsioak egitea.
22 - 09 - 14
Uda amaieran loratu da “Petare, Miren Egigurenen puskak” liburua. Emagineko kidea dugun Leire Ibargurenek idatzi duen bigarren liburua duzue, eta oraingoan ere, Emagin eta Txalapartaren elkarlanaz hezurmamitu da ausarta, hunkigarria, gogorra, maitagarria eta puskatzailea den eleberria.
“Ibarguk idatziko badu, liburuak mereziko du, aurrera!”. Horixe da, finean, Emagin elkarteko unibertsoak buruaren bueltan izan duena, 2019az geroztik. Liburua eskutan duzula, lehen lerro batzuk soilik irakurtzearekin, konturatuko zarete bizitza ezberdin batekin lotzea dela; ezberdin bezain ezaguna zaizula; miresgarria baina zinez erreala dela. Kontakizun goxo, argi eta errez batean josi ditu 9 puska, bederatzi pasarte. Irakurlearen begirada ohituak ez gauden bizipenetan jartzeko magia izan du. Egunerokotasunean oharkabean pasatzen diren erreferenteak direlako liburu honi esker erdigunean jartzen direnak, beste behin: emetasunaren mandatuetatik ihes egin duten emakumeen ahotsak.
Miren Egigurenen bizitza jaso du Ibargurenek oraingoan; hots, bizibide kementsu, koherente, eta umila izan duen Bidaniarrarena. Venezuelan 46 urte luzeetan bizi izan zen, Petaren, non eta Caracaseko auzorik pobreenean. Bertakoekin, bertako bat izan saiatu zen: zoriontsu, libre eta inguruko guztien bizitzak hobetzeko etengabeko txingurri lanetan aritu zen.
“Sinestuna naiz, bai; baina nik nigan sinisten dut. Nire barne indarra da nire bizitzako motore. Eta motorra indartsu dago, bizi gogoz”. Hitz horiekin, Tolosako liburuaren aurkezpenean hunkitu gintuen bertaratutakoak. Kutsatu zigun bizi gogoa, eta sinestarazi aldaketak eta iraultza txikiak gure egunerokotasuna eraldatu dezaketela, zein zentzuz bete.
Harro gaude liburuaz, zinez eskertua “Ibargu”-ri.
Aurrean duzue beraz gure gonbitea. Eskuratu liburua eta murgildu istorio txikiz jositako Mirenen bizitzan.
*Liburua eskuratzeko: edozein liburudendetan. Txalaparta argitaletxearen bidez edo eta Emagin elkartearen bulegoan. Eskariak bulegoa@emagin.eus helbidean ere jaso ahal ditugu. Abenduan Durangoko azokan izango gara.
22 - 06 - 15
Errebeldiak, bakardadeak, epaiak, armairuak, kulpak, iruditeriak, zalantzak, esperientziak… Askotarikoak. Amatasuna, izan aukera, esperientzia, erabakia, ezintasuna edota uko egiten diogun zerbait, emakume ugari zeharkatzen gaituen gaia da. Horregatik esaten dugu (ez)amatasunarena esperientzia kolektiboa dela. Are, izaera guztiz politikoa duen esperientzia kolektiboa da eta horregatik da feminismotik landu beharrekoa. Argi dago amatasunak askotariko esperientziak jasotzen dituela, baina, era berean, kontrol heteropatriarkala iraunarazteko instituzio ere badela.
Azken sasoian, bizitzak erdigunean jarriko dituen gizarte eredu justuago bat aldarrikatzen gabiltza eta horri lotuta gure zaintza sistema jarri dugu jomugan. Bada, bizitzaz eta zaintzaz ari garen honetan, ezinbestekoa da amatasunak gizarte erakunde gisa duen papera aztertzea. Halaber, XXI. mendeak bere dituen ezaugarriekin batera aztertu behar da (ez)amatasunen afera. Aldatu egin baita emakumeok lan merkatuan dugun presentzia, arlo produktibo-publikoak gure bizitzetan duen lehentasuna, harremanak eraikitzeko erak, sare sozialak… Horrek guztiak begirada eguneratzea eskatzen du.
Ikuspegi feministatik aztertu nahi dugu gurasotasuna, eta horri espazio bat ematera datoz azaroaren 11 eta 12rako Emagin Elkartetik antolatu ditugun jardunaldiak. Bi egunetan zehar goiz eta arratsaldeko egitaraua izango dugu. Irailetik aurrera izango ditugu sarrerak eskuragarri.
Web-orrialde hau informazio guztiarekin eguneratuz joango gara: https://amatasunakfeminismotik.emagin.eus/ eta sare sozialetan ere topatuko gaituzue:
Instagram: https://www.instagram.com/amatasunakfeminismotik/
Twitter: https://twitter.com/amatasunak
Animatu!
22 - 06 - 09
Berdintasunean oinarritutako Euskal Herria sortzeko eratu zen Euskal Herriko Bilgune Feminista, orain 20 urte. Urte luzeetan jira eta bira aritu ostean, orduko ametsa biderkatzeko gai ere izan da Bilgunea; izan ere, gaur Euskal Herria Feminista dugu aldarri, eta burujabetza feminista trantsizio hori egiteko bide. Askotariko oztopoei egin zaie aurre, eta, egun, matxismoa birformulatu den honetan, horiek dirauten arren, inoiz baino sinistuago dugu feminismoa dela gure arma nagusia kapitalismo heteropatriarkal eta kolonialari aurre egiteko; hots, ezker eskuin sortu diren paradisuak erretzeko sugarra.
Emagin elkarteak ahizpatasun berezia dugu Bilgunearekin; izan ere, bere magalean sortu ginen orain dela ia 20 urte ere. Horregatik ez dugu Oñatin huts egingo. Nahi dugulako gure komunitatearekin ospatu biziraun diogula ofentsiba matxistei, eta eraiki dugula Euskal Herriko emakume pila batentzat etorkizun hobea. Izan garela bazterretan, eta lehertu ditugula erdiguneak. Euskaratik eta euskaraz ibili garela gure herri luze zabaleko txokoetan. Feminismoa guztion etxe izateko borrokan jarraituko dugula ospatzera goaz larunbatean.
Nahi dugulako berretsi feminismoa dela herri egiten gaituena, saretzen gaituena, eta amesteko tresnak ematen dizkiguna.
Lehertu ginen orain dela 20 urte, eta eztanda horren dardara gara, erreplika gero eta handiagoetan.
22 - 05 - 20
Elkarte eta antolakundeen barruan salatzen diren jarrera eta eraso sexistak gero eta gehiago dira. Horrelako kasuak kudeatzerakoan, zalantza ugari sortzen zaizkigu. Gai honetan hutsune asko daudela ikusi dugu eta azken urteetako esperientzia oinarri Emaginetik tresna praktiko eta erabilgarri bat sortu nahi izan dugu. Indarkeria matxistarekin amaitzeko eta gure mugimendu zein kolektiboetan ematen diren egoerak kudeatzeko ardurak, kolektiboa izan behar duela uste dugu. Dagoeneko ezin dugu inguruko feministengan delegatu horrelako kasuak kudeatzearen erantzunkizuna. Egungo justizia ereduak ere zalantzak sortzen dizkigu, besteak beste, askotan erasoa jasan duenaren berbiktimizazioa ekartzen duelako. Gainera, kontutan hartu behar dugu erasoak aipatzerakoan ez garela soilik bortxaketa bezalako kasu larriez mintzo. Aitzitik, ikusgarrienak diren erasoen azpian gertatzen diren bestelako eraso eta jarrera matxista oro azaleratu nahi dugu. Egunerokotasunean gertatzen diren jokaerak ere mahaigaineratu eta kudeatu behar dira elkarte feminista izan eta kasu larriak ekidin nahi baditugu.
Horregatik, kolektibo edo elkarte bakoitzak bere lanketa eta protokoloa egiteko GIDA BAT sortu dugu. Ez, ordea, zalantza eta beldurrik gabe. Izan ere, kontziente gara elkarte edo kolektiboetan ematen diren erasoak konplexuak direla, askotan harreman pertsonalak zeharkatzen dituztela, aurreikusi ezin diren elementuak gurutzatzen direla, kudeatu beharreko emozio eta behar ezberdinak (askotan kontrajarriak) loratzen direla, etab. Errespetu, zaintza, ardura eta humiltasun askorekin egin beharreko prozesu konplexuak izaten dira. Kasu bakoitza mundu bat da eta ez dago elementu eta aldagai guztiak aurreikusi eta kontrolatu ditzakeen protokolorik. Ondorioz, nabarmenak dira gida honen mugak. Alta, muga eta kontraesanak izan arren, gure asmoa gai honekin komunitate bezala egiten ari garen ikasketa prozesuan tresna praktiko bat eskaitzea da.
Hemen deskargatu dezakezu Gida.
22 - 04 - 29
Susa editorialaren baitako LISIPE bildumaren hurrengo alea Bilgune Feminista eta Emaginena izango da: “ARAKA DITZAGUN GURE BAZTERRAK. Kritika dekolonialak zeharkaturiko ibilbide kolektibo feminista bat“. Liburu hau eragilok dekolonialitatearen inguruan egindako hausnarketak, jasotako interpelazioak eta ibilitako prozesuak sistematizatzeko saiakera da.
Dekolonialitatearen eztabaidak nondik nora zeharkatu gaituen azaleratzeko, lau geltoki nagusitan osatu dugu ibilbide hau: lehen geltokian, gure ibilbide kolektibo nahiz pertsonalean bizi izan ditugun egoera zenbaitek eragindako klak horiek (haustura-egoera horiek) bildu ditugu eta arrakala horiek eragindako sentsazioak batu ditugu; bigarren geltokian, klak horiek eragindako jakin-minetik zein deserosotasunetatik abiatuta, gure jardun feminista janzteko egin ditugun hausnarketak, ekimenak, aliantzak eta esperientziak jaso ditugu; hirugarren geltokian, “Araka ditzagun gure bazterrak” Emakume* Abertzaleon VIII. Topaketa Feministetako kronika jaso dugu; eta azkenik, laugarren geltokian, aurrera begira jarri gara, etorkizuneko lan-lerroak, asmoak eta praktika eraldatzaileak zirriborratzen hasteko
Ez da ariketa erraza gai honen inguruan hitza hartzea, ezta horretarako kokaleku egokia topatzea ere. Umiltasunetik egiten dugu, dena entzuteko eta dena ikasteko daukagula jakitun. Deserosotasunari eta kontraesanari iskin egin gabe, bertan gordetzen direlako korapiloak askatzeko bidezidorrik interesgarrienak. Askotariko begiradak gorpuzten, arrazakeria izendatzen eta gatazka politizatzen irakatsi diguten konpa migratzaile eta arrazializatuak dira gure erreferente nagusiak birkokatze-prozesu honetan. Bihoakie haiei geure aitortza eta eskerrik beroenak.
